Тошкентда янги автобус йўналиши ташкил этилди
Йўловчиларга хизмат кўрсатиш душанбадан бошланади.
3 октябрдан бошлаб 136-сонли “Экскаватор заводи бекати — Чорсу метроси бекати” автобус йўналиши ташкил этилади. Бу ҳақда “Тошшаҳартрансхизмат” акциядорлик жамияти маълум қилди.
Йўналиш ҳаракати тўғри йўналишда “Экскаватор заводи бекати”дан Катта Дарҳон, Оққўрғон, Осиё, Нурафшон, Фаробий, Зарқайнар кўчалари орқали “Чорсу метроси” бекатига қадар, қайтиш йўналишида “Чорсу метроси” бекатидан Зарқайнар, А.Навоий, Беруний, Сақичмон, Фаробий, Нурафшон, Осиё, Оққўрғон, Катта Дарҳон кўчалари орқали “Экскаватор заводи бекати”га қадар соат 6:00 дан 22:25 гача ҳаракатланиши белгиланган.
Хизмат кўрсатиш ҳуқуқи вақтинчалик навбатдаги тендерга қадар жамиятнинг “2-автобус саройи” филиалига бириктирилган. Мазкур йўналишда иш кунларида 6 та, шанба кунларида 5 та ва якшанба кунларида 4 та автобус йўловчиларга хизмат кўрсатади.
