Рим папаси Путиндан урушни тўхтатишни сўради
Франсиск Россиянинг ҳаракатларини қоралашини айтди.
Рим папаси Франсиск Россиянинг Украина ҳудудларини аннекция қилишини қоралади, бошқа халқларнинг ҳуқуқларини ҳурмат қилишга чақирди. Шунингдек, у кўплаб қурбонлар, улар орасида болалар ҳам борлигидан қайғуда эканини билдирди.
"Баъзи хатти-ҳаракатларни ҳеч қачон оқлаб бўлмайди! Ҳеч қачон! Уруш ҳеч вақт ечим эмас, фақат йўқ қилиш эканлигини тушунишимиз учун яна қанча қон тўкиш керак? Мен зудлик билан ўт очишни тўхтатишга чақираман, қуроллар жим бўлсин ва музокараларни бошлаш учун шартлар излайлик, бу куч билан эмас, балки ақл билан ҳал қилиниши мумкин ”, - деди Рим папаси.
Франсиск Россия Федерацияси Президентига мурожаат қилиб, "ўз халқига бўлган муҳаббат туфайли зўравонлик ва ўлимни тўхтатишни", шу билан бирга, халқаро фаол шахслар ва мамлакатларнинг сиёсий раҳбарларидан давом этаётган урушга чек қўйиш учун қўлларидан келганини қилишларини қатъий сўради.
