Айрим фуқаролар санаторийларга онлайн йўлланма олиши мумкин

 

Кексалар ва ногиронлиги бўлган фуқаролар учун Ягона интерактив давлат хизматлари порталида республика санаторийларида ётиб даволанишга онлайн навбатга туриш хизмати ишга туширилди.

 

Ушбу хизмат орқали санаторийларда мавжуд навбатларни олдиндан кўриш имконияти ҳам мавжуд.

 

Навбатга туриш ёки белгиланган тоифага мос бўлмаган ариза берувчиларга рад этилганлик хабарномаси автоматик тарзда етказилади. Шунингдек, ариза берувчи ўз навбатини онлайн кузатиб бора олади.

 

Қуйидагилар ушбу имкониятдан фойдаланишлари мумкин:

 

• Уруш ногиронлари ва қатнашчиларига тенглаштирилган шахслар;
   
• ҳалок бўлган ҳарбий хизматчиларнинг янги никоҳдан ўтмаган бева хотинлари (бева эрлари);
   
• республика аҳамиятига молик шахсий пенсия олувчи шахслар;
   
• Чернобил АЭС ҳалокати оқибатида нурланиш касаллигига чалинган ва уни бошидан кечирганлар, шунингдек, Чернобил ҳалокати сабабли ногирон бўлиб қолган шахслар;
   
• ядро полигонлари ва бошқа радиация-ядро объэктларида ҳарбий хизматни ўтаган пенсия ёшидаги шахслар;
   
• I ва II -гуруҳ ногиронлиги бўлганлар, кўзи ожиз I-гуруҳ ногиронини кузатиб борувчи шахс;
   
• ўзгалар парваришига муҳтож ёлғиз кексалар;
   
• ёшга доир пенсия олувчилар.

 

Ариза берувчи порталдаги “Кексалар ва ногиронлиги бўлган шахсларга санаторийларда даволаниш учун йўлланмалар бериш” хизматини танлаб, керакли сиҳатгоҳни белгилаши ва сўров юбориши мумкин.

 

Мазкур хизмат орқали аввал қоғоз шаклида топширилган аризалар навбатини ҳам кузатиш имконияти мавжуд.