Тошкентда авария сабаб газ таъминоти тўхтатилди

 

Тошкент шаҳрининг Мирзо Улуғбек ва Шайхонтоҳур туманларида газ таъминоти вақтинча тўхтатилди. Бу ҳақда “Ҳудудгаз пойтахт” хабар қилди.

 

Қайд этилишича, Мирзо Улуғбек тумани М. Ганди кўчасида Электр тармоқлари корхонаси иш олиб бораётган вақтда ўрта босимли газ қувурига шикаст етган. Натижада кучли газ сизиб чиқиш ҳолати юзага келган. Шу сабабли 4-октябр куни соат 21:05 да Дархон массивида 25 та кўп қаватли уйлардаги 1500 та хонадонларда, М. Ганди кўчасидаги 80 та ҳовли хонадонларда, “Асака” кўчасидаги 60 та ҳовли хонадонларда ҳамда 16 та улгуржи ташкилотларда газ таъминоти 5-октябр куни соат 09:00 га қадар вақтинчалик тўхтатилган.

 

Шайхонтоҳур тумани “Уч лола” кўчасида йўл қурилиш ходимлари ишлаётган вақтда газ қувурида авария содир бўлганлиги туфайли 4-октябр куни соат 20:00 да “Нурафшон” шоҳ кўчаси ҳамда Мужурмон Обид кўчалари кесишмасида жойлашган “Макро” супермаркетида газ таъминоти вақтинчалик тўхтатилди. Шунингдек, Олимходжаев, “Самарқанд дарвоза” маҳаллаларида газ босими пасайган. Ҳозирда таъмирлаш ишлари олиб борилмоқда. Авария бартараф этилгач газ таъминоти қайта тикланади.