Навоийда банк ходимлари 400 млндан ортиқ пулни талон-тарож қилди
Ҳозирда уларга нисбатан жиноят иши қўзғатилган.
Навоий вилоятида банкоматдаги пулларни ўзлаштирган банк ходимлари аниқланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, Департаментнинг Навоий вилоят бошқармаси томонидан АТБ “Туронбанк” Навоий филиалининг мурожаатига асосан терговга қадар текширув ўтказилган. Унда банкнинг Навбаҳор банк хизматлари офиси масъул ходимлари банкоматга кирим қилиш учун ажратилган 336 млн сўмни ўзлаштириш йўли билан талон-торож қилганликлари, шунингдек, ушбу банкомат кассетасидан 98,8 млн сўмни ечиб олишиб, ўз эҳтиёжлари учун ишлатиб юборганликлари маълум бўлган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
