Фарғонада жиноят ишини ёпиб берувчи шахслар ушланди

 

Фарғона вилоятида Жиноят ишини ижобий ҳал қилиб бериш эвазига фуқародан 10 минг АҚШ доллари миқдоридаги пулларни пора тариқасида қўлга киритмоқчи бўлган шахслар ушланди. Бу ҳақда вилоят ИИБ ахборот хизмати хабар қилди.

 

Қайд этилишича, 5 октябрь куни фуқаро Д.Қ. ҳамда М.Ж.лар олдиндан тил бириктириб, фуқаро Д.Э.нинг тергов органи томонидан айбланиб қамоққа олинган таниши T.R.ni ҳуқуқни муҳофаза қилувчи органларда ишловчи мансабдор шахслар орқали қамоқдан чиқариб, жиноят ишини ижобий ҳал қилиб беришлари эвазига ундан 10 000 АҚШ доллари талаб қилишган.

 

Ўтказган тезкор тадбир давомида юқоридаги шахслар Қўқон шаҳрининг “Туркистон” кўчасида аризачидан 10 минг АҚШ доллари миқдоридаги пулларни олган вақтда ашёвий далиллар билан ушланган. Мазкур ҳолат юзасидан Д.Қ ва М.Ж.ларга нисбатан Жиноят кодексининг 25, 168-моддаси 3-қисми “а” банди ва 28, 211-моддаси 2-қисми “б” банди билан жиноят иши қўзғатилиб, қамоққа олиш тарзидаги эҳтиёт чораси қўлланилган.

 

Шунингдек, муқаддам судланган фуқаро Д.Қ. 3 нафар фуқаролардан жарима майдонидаги автомашинани чиқариш, ҳайдовчилик гувоҳномаси олиб бериш ва бошқа ҳаракатлар учун ҳам пул олганлиги юзасидан аризалар келиб тушган.

 

Ҳозирда тергов ҳаракатлари олиб борилмоқда.