Тинчлик бўйича Нобель мукофоти Россия, Украина ва беларусликларга насиб этди
Улар инсон ҳуқуқлари ҳимояси соҳасида кўрсатган хизматлари учун тақдирланган.
2022 йилда тинчлик бўйича Нобель мукофотига Россия, Украина ва Беларусдаги ҳуқуқ ҳимоячилари лойиқ кўрилди. Бу ҳақда Нобель мукофоти расмий сайти хабар берди.
Мукофотга Россиянинг “Мемориал” маркази, беларуслик фаол Алесь Беляцкий ва Украинанинг “Фуқаролик эркинликлари маркази” сазовор бўлди.
“Улар кўп йиллар давомида ҳокимиятни танқид қилди ва фуқароларнинг асосий ҳуқуқларини ҳимоя қилишни илгари сурди. Улар турли ҳарбий жиноятлар, инсон ҳуқуқларини бузилиши ва ҳокимиятни суиистеъмол қилиш ҳолатларини қайд этишда катта ишларни амалга оширди. Бу номзодларнинг барчаси фуқаролик жамиятининг тинчлик ва демократия учун аҳамиятини кўрсатиб берди”, – дейилади ахборотда.
Маълумот ўрнида: “Мемориал” жамияти Россияда “хорижий агент” деб тан олинган.
