Илон Маскнинг Тайвань бўйича таклифига Пекин нима дейди?
Миллиардер орол атрофидаги низонинг дунё иқтисодиётига ҳалокатли таъсиридан огоҳлантирганди
Илон Маск Financial Times газетасига берган интервьюсида Тайванни Гонконг ёки Макао каби Хитойнинг махсус маъмурий ҳудудига айлантиришни таклиф қилди.
Миллиардернинг фикрича, Тайвань атрофида можаро албатта юз беради ва бу бутун дунёга қимматга тушади. У эскалация содир бўлган тақдирда глобал ЯИМ 30 фоизгача пасайиб кетиши мумкинлигини тахмин қилган.
Бунга жавобан Хитой ТИВ “бир давлат — икки тизим” принципига содиқ эканини таъкидлаган. Вазирлик расмий вакили Мао Ниннинг сўзларига кўра, Тайвань муаммоси Хитойнинг ички масаласи ҳисобланади. Шу билан бирга Пекиннинг бу бўйича позицияси ўзгармас бўлиб қолиши қайд этилган.
Аввалроқ Илон Маск Украина низосини ҳал қилиш бўйича ҳам таклиф берган, аммо бу украиналикларнинг кескин норозилигига сабаб бўлганди. Бунга жавобан Tesla асосчиси Украинага мухлислик қилишини, аммо Учинчи Жаҳон урушини истамаслигини айтган.
