Ўзбекистонда қанча монопол корхона бор?
Монополияга қарши курашиш қўмитаси бу бўйича маълумот берди.
Сўнгги икки йилда давлат иштирокидаги корхоналар сони 30 фоизга камайди. Бу ҳақда Монополияга қарши курашиш қўмитаси раиси ўринбосари Фаррух Карабаев маълум қилди.
Унинг сўзларига кўра, 2021-2022 йиллар давомида давлат иштирокидаги корхоналарни ташкил этиш бўйича жами 45 та мурожаатнинг 33 фоизи Қўмита томонидан рад этилган. Бундан ташқари, давлат иштирокидаги корхоналарга асосий фаолиятидан хос бўлмаган қўшимча фаолият билан шуғулланиш ва бошқа корхоналарда улушга эга бўлиши тақиқланиши натижасида давлат иштирокидаги корхоналар сони сўнгги икки йилда қарийб 3000 дан 2100 тагача қисқарди.
Умуман олганда, монопол корхоналарнинг умумий миқдори охирги 5 йилда 20 фоизга камайган ва уларнинг сони 90 тани ташкил этмоқда.
Бундан ташқари, рақобатга таъсири баҳоланган мингдан ортиқ норматив-ҳуқуқий ҳужжатлар лойиҳаларининг деярли 65 фоизида рақобатга зид нормалар борлиги аниқланган.
