Сирдарёда ноқонуний балиқ овловчилар қўлга тушди
Ҳозирда уларнинг иши судга оширилган.
Кеча, 8 октябрь куни Сирдарё вилоят Экология бошқармаси давлат инспекторлари, ДХХ чегара қўшинлари ҳамда ИИБ ходимлари ҳамкорлигида тунги рейд тадбири ўтказилди. Бу ҳақда Давлат экология қўмитаси хабар бермоқда.
Қайд этилишича, тадбир давомида Сирдарё тумани “Шоликор” СИУ ҳудудидан оқиб ўтувчи “Сирдарё” дарёсидан ноқонуний равишда фуқаролар М.М. ва Н.Э. томонидан тақиқланган ов қуроли ва лескали тўр ёрдамида уч турдаги 46 дона (30 дона сазан, 8 дона судак, 8 дона жерх) балиқлар овланганлиги аниқланган.
Содир этилган ҳуқуқбузарлик ҳолати юзасидан фуқароларга нисбатан Маъмурий жавобгарлик тўғрисидаги кодекснинг 90-модда 4-қисми билан маъмурий баённома расмийлаштирилиб, тўпланган ҳужжатлар жиноят ишлари бўйича Сирдарё туман судига тақдим этилган.
