Путин сафарбарлик тугатилишини маълум қилди
Шунингдек, у ўз чиқишида дон коридори масаласига тўхталиб ўтди.
Россияда сафарбарлик икки ҳафта ичида якунланади. Бу ҳақда Россия президенти Владимир Путин маълум қилди.
“Корреспондент” нашри хабарига кўра, Мудофаа вазирлиги режалаштирган 300 минг кишидан 222 минги сафарбар қилинган. Путин фронтдаги тўқнашув чизиғи ҳозирда 1100 километрни ташкил этгани ва уни шартнома асосидаги аскарлар билан ушлаб туриш деярли имконсиз бўлгани учун сафарбарликка эълон қилинганини таъкидлаган.
Шунингдек, у журналистнинг бирор нарсадан афсусланасизми, деган саволига жавоб бериб, бугунги кундаги барча воқеалар “юмшоқ қилиб айтганда, ёқимли эмас”лигини тан олган.
Унинг сўзларига кўра, Россия ўз олдига Украинани йўқ қилиш вазифасини қўймаган.
Россия раҳбари дон коридоридан “террорчилик ҳужумлари учун” фойдаланилаётгани аниқланса, уни ёпиш билан таҳдид қилган.
