Трампни АҚШ Конгрессига кўрсатма олиш учун чақиришмоқчи
Собиқ президент бу қарорни кескин танқид қилди.
АҚШ Конгрессининг вакиллар палатасининг Капитолий ҳужумини суриштирув комиссияси собиқ президент Дональд Трампни кўрсатма бериш учун чақирмоқчи.
Қўмитанинг 13 октябрь куни бўлиб ўтган йиғилишида унинг барча аъзолари Трампни сўроққа чақиртирилишига розилик билдирган. Мажлис давомида Капитолийга ҳужум давомида олинган видео ҳам намойиш этилган.
Бундан ташқари, АҚШ махфий хизмати агентларининг ёзишмалари ҳам очиқланган. Улар 2020 йилнинг 26 декабрида президент сайлови натижаларидан норози бир гуруҳ шахслар ҳужум уюштириши мумкинлигидан огоҳлантирган.
Ўз навбатида Трамп қўмитанинг бу қарорини кескин танқид қилди ва “алжираш” сифатида баҳолади. Собиқ президент ушбу комиссияни АҚШни янада парчалаб юборишда айблаган.
Трамнинг тарафдорлари 2021 йил 6 январь куни Капитолий биносига ҳужум уюштирганди. АҚШнинг амалдаги раҳбари Жозеф Байден буни қуролли исён сифатида баҳолаган.
Аввалроқ Дональд Трамп АҚШни тушкунликдаги давлат деб атаганди.
