Наманганда халқаро асал фестивали бўлиб ўтади
Унда 250 дан ортиқ асаларичилар иштирок этади.
28–30 октябрь кунлари Наманган шаҳридаги “Афсоналар водийси” истироҳат боғида Биринчи Наманган халқаро асал фестивали ўтказилади.
Фестиваль Туризм ва маданий мерос вазирлиги Наманган вилояти Бош бошқармаси томонидан ташкил этилади. Унда 250 дан ортиқ маҳаллий ва хорижлик асаларичилар ўз маҳсулотларини намойиш қилади.
Шунингдек, тадбир иштирокчилари асал маҳсулотлари, асаларичилик, асал йиғиш ва асалари уйлари ҳақида барча маълумотларни билиб олиш, қолаверса, асал мумидан малҳам ишлаб чиқариш, асаларичилик ҳунармандчилиги буюмларини тайёрлаш, асалнинг бир нечта навларини татиб кўриш имконига эга бўлади.
Бундан ташқари, тадбир дастуридан республикада қишлоқ хўжалиги туризмини ривожлантириш масалаларига бағишланган “Илмий-амалий конференция” ва асал кўргазмалари, спорт мусобақалари, меҳмонлар учун концерт, шунингдек асаларичилик соҳасидаги етакчи маҳаллий ва хорижлик асаларичилик соҳасидаги мутахассислардан маҳорат дарслари ўрин олган.
Фестиваль доирасида “Афсоналар водийси” истироҳат боғида “Энг яхши қадоқланган асал” ва “Энг табиий асал” номинациялари бўйича танловлар ўтказиш ҳам режалаштирилган.
