Самарқандда озиқ-овқат хавфсизлиги бўйича халқаро анжуман бўлиб ўтди

 

14-15 октябрь кунлари Самарқанд шаҳрида БМТнинг Озиқ-овқат ва қишлоқ хўжалиги ташкилоти (ФАО) ва Қурғоқчил минтақаларда қишлоқ хўжалиги тадқиқотлари халқаро маркази (ICARDA) кўмагида “Озиқ-овқат хавфсизлиги: Глобал ва миллий муаммолар” мавзусида IV халқаро илмий-амалий анжуман бўлиб ўтди. 

 

Йирик илмий форум Бутунжаҳон озиқ-овқат кунига бағишланди. 16 октябрь глобал ҳамжамиятни озиқ-овқат хавфсизлигига эришиш ва дунёдаги очликни йўқ қилиш учун биргаликда ишлашга ва барча учун яхшироқ, барқарор келажакни яратишга чақиради.

 

Ажуманда Германия, Қозоғистон, Покистон, Россия, АҚШ ва Тожикистондан 30 нафар соҳа вакиллари, шунингдек, 240 дан ортиқ маҳаллий мутахассис ва олимлар иштирок этди. Иштирокчилар томонидан қизғин муҳокамалар билан кечган маърузалар ва тақдимотлар қилинди, кўплаб қизиқарли ғоя ва фикрлар билдирилди, ёрқин фактлар ва илмий изланишларнинг янги натижалари тақдим этилди.

 

Жумладан, Вашингтон университети профессори Томас Лампкин (АҚШ) “Иқлим ўзгариши ва агроэкотизимларнинг маҳсулдорлиги” мавзусида, Қаид-и Азам Университети профессори Муҳаммад Зафар (Покистон) “Ёввойи меваларнинг парҳез бирикмаларини таҳлил қилиш ва уларнинг озиқ-овқат хавфсизлиги ва барқарорлигига қўшган ҳиссаси” мавзусида маъруза қилди. Ўз навбатида, Санкт-Петербург биотехнология ва озиқ-овқат ишлаб чиқариш Олий мактаби директори Юлия Базарнова (Россия) “Озиқ-овқат хавфсизлиги соҳасидаги янги таълим технологиялари” ҳақида гапирди.

 

Конференция “Коронавирус пандемияси даврида Ўзбекистон ва жаҳонда озиқ-овқат хавфсизлигини таъминлаш Концепциясини амалга оширишнинг муҳим масалалари ва муаммолари”, “Ноқулай минтақаларда табиий ресурслардан барқарор фойдаланишнинг устувор йўналишлари”, “Озиқ-овқат хавфсизлигини таъминлашда замонавий био- ва агротехнологиялардан фойдаланишнинг аҳамияти”, “Овқатланиш соҳасидаги замонавий тадқиқотлар” ва “Озиқ-овқат хавфсизлигини таъминлашда фан, таълим ва ишлаб чиқаришнинг интеграцияси” каби йўналишларда иш олиб борди.