Куба АҚШнинг 60 йиллик санкцияларидан қанча зарар кўргани ҳисобланди
Вашингтон ушбу давлат иқтисодиётига 1962 йилда эмбарго жорий этган.
Куба 1962 йилдан буён АҚШ санкциялари туфайли 154 миллиард доллар зарар кўрди. Бу ҳақда мамлакат ташқи ишлар вазири Бруно Родригес Паррилья маълум қилди.
“Сўнгги олтмиш йилда умумий зарар ҳозирги ҳисоб-китобларга асосан 154.2 миллиард долларни ташкил этади. Қамал Трамп президентлиги даврида мисли кўрилмаган даражада кучайтирилди. Ҳозирги кунда президент Жозеф Байден ҳукуматининг Кубага нисбатан сиёсати ҳам, афсуски, республикачиларникидан фарқ қилмайди. Ҳеч қандай ўзгариш бўлмади”, – деган вазир.
Дипломатнинг қўшимча қилишича, Байден администрацияси бошқарувининг дастлабки 14 ойида иқтисодий қамал туфайли 6.364 миллиард доллар зарар кўрилди.
Вашингтон Куба билан 1961 йилда дипломатик алоқаларни узган. Бунга Америка мулкларининг миллийлаштирилиши сабаб бўлган. 1962 йил 3 октябрда эса АҚШ ушбу давлатга қарши савдо-иқтисодий эмбарго жорий этган. Ушбу санкцияларнинг бекор қилиниши Куба ташқи сиёсатининг устувор йўналишларидан бири саналади.
