Фарғонада ҳомиладор аёлнинг ўлими юзасидан қўшимча маълумот берилди

 

Фарғона вилоятининг Бешариқ туманидаги тиббиёт бирлашмасида аёл вафот этди ва унинг ҳомиласи нобуд бўлди. Бу ҳақда “Renessans” телеканалининг “Ovoza” информасион дастурида хабар қилинди.  

 

Вилоят прокуратурасининг маълум қилишича, жорий йилнинг 30 август куни марҳума Ю.Р. иккинчи туғруқдан сўнг ҳомилани она қорнидаги ўлими, ҳомилани олиб ташлаш бўйича ўтказилган кесарча-кесиш амалиётидан сўнг бачадон қон кетиши, бачадон ва уни ортиқлари билан олиб ташлаш гистоектомия-релапоратомия амалиётидан кейинги ҳолат ташхиси билан Бешариқ тумани Тиббиёт бирлашмасидан Қўқон шаҳар Тиббиёт бирлашмасининг Марказий шифохонасига ўтказилган. Бироқ кўрсатилган тиббий ёрдамга қарамасдан 8 сентябр куни аёл шифохонада вафот этган.

 

Ю.Р.нинг вафот этганлиги ҳолати юзасидан ўтказилган суд тиббий экспертизаси, РСТЕИАМ Фарғона филиалининг комиссион суд-тиббий экспертиза хулосалари ва терговга қадар текширув давомида тўпланган бошқа далилларга асосланиб, унинг ўлими холатида бирон-бир шахснинг ҳаракатларида жиноят таркиби мавжуд бўлмаганлиги сабабли 08 октябр куни жиноят иши қўзғатишни рад этиш ҳақида қарор қабул қилинган.

 

“Вилоят прокуратураси томонидан қарорнинг қонунийлиги ўрганилганда, уни бекор қилиш учун асослар топилмади”, — дейилади хабарда.