Қарши шаҳар собиқ ҳокими яна қамоққа олинди
Ҳолат бўйича вилоят прокуратураси изоҳ берди.
Аввалроқ Қашқадарё вилояти Қарши шаҳрининг собиқ ҳокими Ж.Фозиловга нисбатан киритилган қамоққа олиш тарзидаги илтимоснома рад этилиб, уй қамоғи эҳтиёт чораси қўлланганди.
Шундан сўнг мазкур ажримга Қарши шаҳар прокурори томонидан вилоят судининг жиноят ишлари бўйича апелляция инстанциясига апелляция тартибида протест келтирилган.
Апелляция инстанциясининг 2022 йил 22 октябрь кунги ажримига кўра, Қарши шаҳар судининг Қарши шаҳар собиқ ҳокими Ж.Фозиловга нисбатан киритилган қамоққа олиш тарзидаги илтимоснома рад этилиб, уй қамоғи эҳтиёт чораси қўллаш ҳақидаги ажрими бекор қилиниб, қамоққа олиш тариқасидаги эҳтиёт чорасини қўллаш ҳақидаги илтимоснома қаноатлантирилди.
“Ж.Фозилов ва бошқаларга нисбатан қўзғатилган жиноят иши алоҳида назоратга олинган бўлиб, тергов натижалари юзасидан маълумот берилади”, — дейилади хабарда.
