Россиялик миллиардер Фридманнинг ўғли ўзини украин деб атади
У Киевдан ўзига қарши санкцияларни бекор қилишни сўраган.
Россиялик миллиардер Михаил Фридманнинг ўғли Александр Ожельский ўзига қўйилган Украина санкцияларини танқид қилиб чиқди. У 24 февралдан кейин Россияни тарк этгани ва Лондонда қуролли можарога қарши акцияда иштирок этганини айтмоқда.
“Менимча, бу қарор бекор қилиниши лозим. Мен санкцияларга лойиқ эмасман. Ўзимни украин деб биламан, у ерда менинг яқинларим бор, Украинага боришга одатланиб қолганман. Аммо ҳозир буни амалга оширишимга ишонмайман”, – деган у.
22 ёшли Ожельский ҳозирда Дубайда яшаётганини маълум қилган. У Россиядаги бизнеси ва дўстларини ташлаб келганини ва ватанига қайтиш истаги йўқлигини таъкидлаган.
Жаноб Ожельский миллиардер Михаил Фридманнинг ягона ўғил фарзанди ҳисобланади. Тадбиркор бундан олдин барча бойлигини фарзандларига қолдирмоқчи эканини айтганди. Унинг ўғли 20 октябрда Украина санкциялари рўйхатига киритилди.
