NYT: Исроил Украина билан муҳим разведка маълумотларини бўлишган
Тель-Авив Киевга гуманитар ёрдам етказиб туришга ваъда берган.
Исроил Украинага Эрон томонидан Россияга етказиб берилган дронларга қарши курашиш учун зарур бўлган разведка маълумотларини тақдим этди. Бу ҳақда "The New York Times" хабар берди.
Ўтган сешанба куни Украина ташқи ишлар вазири Дмитрий Кулеба Исроил ҳукуматига Киевни ҳаво ҳужумидан мудофаа тизимлари билан зудлик билан таъминлашни сўраб расмий нота юборишини маълум қилган эди. Эртаси куни Исроил мудофаа вазири Бени Ганц Исроил НАТО давлатлари билан биргаликда Украинани қўллаб-қувватлашини, аммо “оператив сабабларга кўра” ҳали ҳам Киевни қурол-яроғ билан таъминлаш ниятида эмаслигини айтди.
Европа Иттифоқига аъзо давлатлар элчилари билан учрашувда нутқ сўзлаган вазир Исроил Киевга инсонпарварлик ёрдами ва ноҳарбий техника етказиб беришда давом этишини таъкидлади.
Аввалроқ Россия ва Эрон расмийлари бир қатор Ғарб ОАВларининг Украинада фойдаланиш учун Россияга Эрон дронлари етказиб берилиши ҳақидаги даъволарини рад этган эди. РФ Президентининг матбуот котиби Дмитрий Песков армия маҳаллий ишлаб чиқарилган учувчисиз учоқлардан фойдаланишини таъкидлади.
