WP: “Путиннинг ошпази” ва Сергей Шойгу ўртасида зиддият кучайган

 

“Вагнер” хусусий ҳарбий компанияси асосчиси Евгений Пригожин Владимир Путин билан учрашувда Россия ҳарбий раҳбариятини танқид қилган. Бу ҳақда The Washington Post газетасида эълон қилинган мақолада сўз боради.

 

Октябрь бошида газета Путинга яқин бўлган одамлардан бири Президентга Украинадаги ҳарбий ҳаракатлар вақтида йўл қўйилган хатолар ҳақида очиқ айтгани ҳақида хабар берганди. Washington Post бу айнан жаноб Пригожин бўлганини иддао қилмоқда.

 

Тадбиркор мудофаа вазирлигининг “Вагнер”га қаттиқ суянаётганини кескин танқид қилган. Шу билан бирга вазирлик компания жангчиларини етарли даражада молиявий ва ҳарбий жиҳатдан қўллаб-қувватламаганини таъкидлаган.

 

Бу биринчиси эмас

 

Пригожин бундан олдин ҳам армия олий раҳбариятини очиқ танқид қилганди. Номи сир қолишини истаган америкалик амалдорнинг сўзларига кўра, “Вагнер” асосчиси кескин баёнотларида Путин шахсиятига тегмайди ва ўзини тобора “бемалол” ҳис қиляпти. Бу Россия ҳарбий муваффақиятсизликлари фонида унинг таъсири кескин ошганини кўрсатади.

 

“У эгаллаган сиёсий позициянинг мазмуни қуйидагича: ‘Мен Евгений Пригожинман. Бу ерда сизга ҳақиқатни айтиш учун турибман ва ўз ишимни бажардим’ ”, – деган манбалардан бири.

 

АҚШ разведкасига кўра, айнан Пригожин рус аскарларининг таъминотдан арз қилиб чиққан видеонинг тарқатилиши ташаббускори бўлган. Бу орқали тадбиркор ўз ҳарбий компаниясига кўпроқ молиявий маблағлар ажратиш мақсадида Кремлга босим ўтказишга ҳаракат қилган.

 

Ўз навбатида “Вагнер”  хўжайини “Конкорд” компанияси орқали Washington Post сўровига жавоб берган. Унда Пригожин Путин билан яқин орада шахсан гаплашмагани, яқин келажакда ҳам Президент қабулига кирмаслигини айтган.

 

“Мен РФ Қуролли кучлари раҳбариятини Украинадаги ҳаракатларини танқид қилмаганман. Шу сабабли ҳеч қандай изоҳ беролмай ман”, – деган бизнесмен.

 

Бундан ташқари, у ҳарбий эксперт эмаслигини, шу сабабли ҳеч кимни танқид қилиш ҳуқуқи йўқлигини, сабаби ҳарбий эксперт эмаслигини айтган.

 

Россия Президенти матбуот котиби Дмитрий Песков эса ҳолатга изоҳ беришдан бош тортган.

 

Шойгу билан келишмовчиликлар

 

Америка разведкасининг алоҳида пунктида Пригожин ва мудофаа вазири Сергей Шойгу ўртасида зиддият кучайгани қайд этилган.

 

Ҳарбий ҳаракатларда Пригожин ва Чеченистон раҳбари Рамзан Қодиров каби шахсларнинг ролининг ўсиб бораётгани айрим россиялик сиёсатчиларнинг норозилигига сабаб бўлмоқда. Уларни ҳарбий етакчилар сифатида эмас, балки ўз қоидалари билан ўйнайдиган авантюристлар сифатида кўришмоқда.

 

Пригожин узоқ йиллар давомида “Вагнер” хусусий ҳарбий компаниясига алоқаси борлигини инкор этиб келган. Аммо 2022 йил сентябрида ҳарбий компанияга асос солганини тан олди.