Қашқадарёда яна истеъмолга яроқсиз гўшт аниқланди
Ҳолат юзасидан вилоят ИИБ маълумот берди.
Кеча, 27 октябрь куни Қашҳқадарё вилоятининг Китоб туманида автомобилда ортиб кетилаётган сифациз гўшт маҳсулотлари тўхтатиб қолинди. Бу ҳақда вилоят ИИБ ахборот хизмати хабар бермоқда.
Қайд этилишича, соат 21.30 ларда Китоб–Тошкент йўналишида ҳаракатланиб келган Нексия–2 русумли автомашина Китоб туман ҳудудида жойлашган “Мингчинор” мунтазам ЙПХ масканида тўхтатилган.
Ҳайдовчи Шаҳрисабз шаҳрида яшовчи Ҳ.Д. бошқарувидаги автомашина салони ва юкхонаси ИИБ ЙҲХБ ва Карантин бўлинмаси ходимлари томонидан кўздан кечирилганда тегишли ветеринария маълумотномаларисиз, 250 килограмм оғирликдаги йирик шохли қорамол гўшти борлиги аниқланган.
Гўшт маҳсулотлари Қашқадарё вилояти ҳайвонлар касалликлари ташхиси ва озиқ-овқат маҳсулотлари хавфсизлиги давлат маркази лабораториясида текшириб кўрилганда истеъмолга яроқсизлиги маълум бўлган.
Гўшт маҳсулотлари истеъмолга яроқсизлиги боис тегишли тартибда йўқ қилинган. Ҳолат юзасидан суриштирув ҳаракатлари олиб борилмоқда.
Эслатиб ўтамиз, аввалроқ Қашқадарё вилоятининг Китоб туманида автомашинада Тошкентга сифациз гўшт маҳсулотларини олиб кетаётган аниқланганди.
