Москванинг музлатилган активлари қайтарилиши мумкин, фақат...
Ҳозирда Россиянинг 300 миллиард евро захираларига тақиқ қўйилган.
Агар Москва Украинани тиклашда иштирок этса, унинг музлатиб қўйилган 300 миллиард евро захиралари тақиқдан чиқарилиши мумкин. Бу ҳақда ЕИнинг адлия ва қонун устуворлиги масалалари бўйича комиссари Дидье Рейндерс маълум қилди.
“Фикримча, 300 миллиард евро захирани асраб қўйиш керак. Бу Россия Украинани ўз хоҳиши билан тиклашни бошламагунча кафолат тариқасида туриши керак”, – деган еврокомиссар Funke нашрига берган интервьюсида.
Ҳозирда Евроиттифоқнинг 7 давлатида РФга тегишли 17 миллиард евро активлар музлатилгани таъкидланган. Улар жами 90 нафар россияликларга тегишли.
Расмий Брюссель бир неча бор Москвага тегишли активларни мусодара қилиш истагини билдирган. 21 октябрь куни Еврокенгаш уларни Украинага тақдим этиш йўлларини топиш бўйича топшириқ берди. бундан ташқари, Киев ҳам БМТда Россиядан товон ундириш бўйича резолюция қабул қилинишини истаяпти.
