Тошкентнинг айрим туманларида газ таъминоти узилади
“Ҳудудгазпойтахт” бу бўйича огоҳлантириш билан чиқди.
Таъмирлаш ишлари туфайли бугун Янгиҳаёт, Сергели, Чилонзор туманларининг баъзи маҳаллаларида газ таъминоти вақтинчалик тўхтатилади. Бу ҳақда “Ҳудудгаз пойтахт” газ таъминоти филиали маълум қилди.
Қайд этилишича, Янгиҳаёт тумани “Чоштепа” маҳалласи ҳудудидан ўтган юқори босимли D-530 мм газ қувурига электрон газ ҳисоблагич ўрнатиш ишлари режалаштирилган. Шу сабабли 29-октябр куни соат 10:00 дан 18:00 га қадар Янгиҳаёт тумани, “Янги Чоштепа”, “Чоштепа” маҳаллаларида, Сергели тумани “Жунариқ” маҳалласида, Чилонзор тумани “Бешқўрғон” маҳалласида ҳамда юқорида кўрсатиб ўтилган манзиллардаги барча турдаги улгуржи ташкилотларида газ таъминоти тўхтатилади.
Шунингдек, Чилонзор тумани “Чорбоғ” кўчасидаги “Eko gazoil” автомобилларга газ тўлдириш компрессор шохобчасида, “Бунёдкор” кўчасидаги “ToshBusXizmat” автомобилларга газ тўлдириш шохобчасида, юқори босимли газ қувурига уланган барча турдаги 25 та улгуржи ташкилотларида, жумладан, 3 та Автомобилларга газ тўлдириш шохобчасида газ таъминоти узилади.
