Яккабоғда тўхтаб турган MAN ёниб кетди
Ҳолат юзасидан ФВБ маълумот берди.
Кеча, 29 октябрь куни Қашқадарё вилоятининг Яккабоғ туманида юк машинаси ёниб кетди. Ҳолат юзасидан вилоят Фавқулодда вазиятлар бошқармаси маълумот берди.
Қайд этилишича, соат 21:43 ларда Яккабоғ тумани Фавқулодда вазиятлар бўлимига фуқаролардан юк машинаси ёнаётганлиги тўғрисидаги хабар келиб тушган. Хабарга кўра, воқеа жойига соат 21:50 ларда қутқарув хизматидан 1 та бўлинма етиб бориб, ёнғинни тахминан соат 22:13 лар атрофида тўлиқ ўчирган.
Ҳодиса туманнинг «Оқтош» МФЙ ҳудудидан ўтувчи йўл ёқасида юз берган. Аниқланишича, ушбу транспорт воситаси Самарқанд вилояти Нарпай туманида яшовчи 1979 йилда туғилган фуқаро З.Х. бошқарувидаги «MAN» русумли юк машинаси бўлган.
Ёнғин оқибатида юк автомобилининг олд (кабина) қисми ёниб зарарланган. Ҳеч ким тан жароҳати олмаган. Ёнғин сабаби ва зарарига аниқлик киритилмоқда.
Жавоҳирбек ТУРСУНОВ
