Андижондаги балиқхонада фоҳишахона аниқланди
Рейд тадбирларида 19 ёшли аёл қўлга тушган.
Андижон вилоятининг Улуғнор туманида балиқхона ичида фоҳишахона ташкил этганлар қўлга олинди. Бу ҳақда “Ўзбекистон 24” телеканалининг “Вазият 24” кўрсатувида хабар қилинди.
Маълум бўлишича, вилоят Ички ишлар бошқармаси одам савдоси ва ноқонуний миграцияга қарши курашиш бўлими ҳамда Улуғнор тумани ички ишлар бўлими ходимлари томонидан тезкор тадбир ўтказилган. Тадбир давомида тумандаги умумий овқатланиш шохобчаси ниқоби остида қўшмачилик фаолияти билан шуғилланиб келаётганлар аниқланган.
Туман ҳудудидаги балиқхонада иш юритувчи бўлиб ишлаб келаётган 44 ёшли аёл 19 ёшли аёлнинг 200 минг сўм эвазига фоҳишалик билан шуғулланишига шароит яратиб берган вақтида рейд тадбири иштирокчилари ашёвий далиллар билан қўлга олган.
Мазкур ҳолат юзасидан туман ички ишлар бўлими ҳузуридаги тергов бўлими томонидан Жиноят кодексининг 131-моддаси (қўшмачилик қилиш ёки фоҳишахона сақлаш) 1-қисми билан жиноят иши қўзғатилиб, тергов ҳаракатлари олиб борилаётгани маълум қилинган.
