Музокаралар, “ғалла келишуви” ва сафарбарлик якунланиши

 

Кеча Сочида Россия, Арманистон ва Озарбайжон етакчилари ўртасида уч томонлама музокаралар бўлиб ўтди. Аввалига Россия Президенти Никол Пашинян ва Илҳом Алиев билан яккама-якка мулоқот ўтказди. Кейинчалик “Русь” санаториясида уч томонлама учрашув бўлди.

 

Музокаралардан сўнг Владимир Путин журналистлар олдида чиқиш қилиб қатор муҳим баёнотларни берди.

 

Уч томонлама музокаралар бўйича

 

“Тинчлик шартномасига ҳозирча эришилмади ва бу ерда ҳозирча ушбу ҳужжат асослари ҳақида гапиришга эрта, нима бўлган тақдирда ҳам бу ўзаро манфаатли музокаралар натижаси ҳисобланади”, – деб фикр билдирди  Путин Арманистон-Озарбайжон ўртасида тинчлик шартномаси тўғрисида.

 

Россия раҳбари келишувни хотиржам, ёпиқ форматда ўтказишни, чунки кўтариладиган масалалар ҳар икки томон учун ҳам нозик эканини таъкидлаган. Бундан ташқари, у Боку ва Ереванга чегара делимитация ва демаркацияси учун зарур хариталарни беришга тайёрлигини айтган.

 

 Сафарбарлик якунлангани бўйича

 

“Очиғини айтсам, бу ҳақда ўйлаб кўрмадим.  Сафарбарлик якунлангани тўғрисида фармон чиқариш кераклиги ҳақида юристлар билан гаплашаман. Аммо у тугаган. Нуқта қўйилди”, – деган Путин.

 

“Ғалла келишуви”нинг келажаги

 

Путин Россиянинг “ғалла келишуви”дан чиқмаганини, балки ундаги иштирокини тўхтатганини маълум қилган. шунингдек, у бунга сабаб қилиб гуманитар коридорга туғилган таҳдидларни кўрсатган. РФ раҳбари бу коридордан Украина дронлари Қора денгиз флотига ҳужум уюштирганини иддао қилган.

 

Путин Украина ушбу масала бўйича БМТ билан ишлаши ва кемалар хавфсизлигига кафолат бериши зарурлигини айтган.

 

Украина билан тинчлик шартномаси ҳақида

 

“Украина томонида биз билан гаплашиш нияти йўқ. Аммо бизнинг ниятимиз ҳаммага маълум ва у ўзгармайди. Музокаралар столига олдиндан шартларни қўйиш мақбул иш эмас”, – деган жаноб Путин.