Тошкентда ЙПХ ходимлари қоидабузар ҳайдовчининг автомашина ойналарини синдиришди

 

Ижтимоий тармоқларда ЙПХ инспекторлари Нексия–2 русумли транспорт воситасини тўхтатишга уринаётгани акс этган видео тарқалди. Ҳолат юзасидан шаҳар ИИББ расмий муносабат билдирди.

 

Қайд этилишича, 1 ноябрь куни соат 17.00 ларда 2004 йилда туғилган А.Х. Нексия–2 русумли автомашинани “правасиз” ҳолда бошқараётган вақтида йўлда уч маротаба ЙПХ инспекторларининг қонуний талабларига бўйсунмасдан ҳаракатни давом эттирган. 

 

Тўртинчи маротаба Юнусобод тумани Амир Темур ва “Шаҳрисабз” кўчалари кесишган чорраҳасида ЙПХ инспектори М.Турдиев томонидан жезл ва хуштак ёрдамида тўхташ ишораси берилганда ҳайдовчи катта тезликда ҳаракатни давом эттирган. Бир нечта ходимларнинг қонуний талабларига бўйсунмасдан ҳаракатини давом эттираётган ушбу автомобиль ҳаракатини чеклаш мақсадида бошқа транспорт воситалари тўхтатилган. Сўнг Амир Темур – Алишер Навоий – Шахрисабз кўчалари кесишган чоррахада ЙПХ инспектори Д.Ганиев томонидан транспорт воситаси тўхтатиб қолинган. Ҳайдовчи ўзини шубҳали тутганлиги, ходимларнинг эшикни очиш ва транспорт воситасидан тушиш ҳақидаги қонуний талабига бўйсунмасдан, транспорт воситасини ичкаридан қулфлаб олганлиги сабабли транспорт воситасининг ойнасини синдириш орқали ҳайдовчининг эшиги очилган ва ҳайдовчининг транспорт воситасини бошқариш имконияти чекланган. 

 

Мазкур ҳолат юзасидан ҳайдовчи Акбар Х.га нисбатан Ўзбекистон Республикаси Маъмурий жавобгарлик тўғрисидаги кодекснинг 194-моддаси (“Ички ишлар органлари ходимининг қонуний талабларини бажармаслик”) билан маъмурий баённома расмийлаштирилган. Транспорт воситаси жарима майдонига жойлаштирилган.