Эксперт: Украинани музокаралар столига олиб бориш шарт
Бунга мажбур қилаётган омиллар очиқланди.
Россия-НАТО низоси авж олиб кетмасидан АҚШ Украинани тезроқ музокаралар столига олиб бориши керак. Бу ҳақда Жоржтаун университети профессори Чарльз Купчаннинг The New York Times газетасида эълон қилинган мақоласида сўз боради.
Муаллифнинг фикрича, Жозеф Байден администрацияси Украинани қўллаб-қувватлашни стратегик устувор вазифа деб атаб тўғри йўл тутган. Бу низога тўғридан-тўғри аралашишдан қочишга имкон беради.
"Шу билан бирга, АҚШнинг ўз манфаатларига жавоб берадиган даражадаги иштирокини сақлаб қолиш тобора қийинлашмоқда. НАТО ва Россия ўртасида тўғридан-тўғри тўқнашувнинг олдини олиш мақсадида Вашингтон учун Киев ҳарбий режалари янада аниқ бўлиши, АҚШ амалдорлари эса Украина қандай жанг олиб бораётгани ҳақида кўпроқ маълумотга эга бўлиши керак. АҚШ Украинанинг оператив режалаштиришида қатнашиши керак", — деган Купчан.
Унинг қўшимча қилишича, НАТО ва Россия ўртасида кенг қамровли низо бошланиб кетиши хавфи кундан-кунга ортмоқда. Шу сабабли эксперт Вашингтон ва унинг иттифоқчиларини низони бошқаришда иштирок этишга ва унинг дипломатик якунланишини таъминлашга чақирган.
