Фарғонада ИИБ ходимлари фуқарони дўппослаб олиб кетгани айтилди

 

Ижтимоий тармоқларда Фарғона вилоятининг Қува туманида ИИБ ходимлари фуқарони резина таёқ билан дўппослаб, машинага мажбуран ўтқазишгани акс этган видео тарқалди. Ҳолат юзасидан вилоят Ички ишлар бошқармаси расмий муносабат билдирди.

 

Маълум бўлишича, 4-ноябр куни Қува тумани ИИБ профилактика инспектори М.Т. ва С.Ж.лар “Пастки Хўжа Хасан” МФЙ ҳудудида фуқаро О.Й. маст ҳолатда жамоат тартибини бузаётганлигини кўриб, шахсига ойдинлик киритиш ва мастлик ҳолатини аниқлаш учун тиббий текширувга боришга таклиф қилинганда фуқаро О.Й. ИИБ ходимларининг қонуний талабларига бўйсунмай, фаол қаршилик кўрсатган.

 

Ходимлар “Ички ишлар тўғрисида”ги Қонуннинг 23-моддаси ҳамда Ички ишлар вазирининг “Ички ишлар органлари ходимлари томонидан жисмоний куч ишлатиш, махсус воситаларни ва ўқ отар қуролни қўллаш тартиби тўғрисидаги йўриқномани тасдиқлаш ҳақида”ги 55-сонли буйруғи талабларидан келиб чиқиб, ҳуқуқбузарлик ҳолатини бартараф этиш учун О.Й.гa нисбатан махсус восита–резина таёқдан фойдаланишган.

 

Мазкур ҳолат шу куннинг ўзида тегишли тартибда рўйҳатга олиниб, О.Й.нинг хатти-ҳаракатлари юзасидан Маъмурий жавобгарлик тўғрисидаги кодекснинг 183-, 194-моддаларига асосан ҳужжатлар расмийлаштирилган.

 

“Фуқаро О.Й. билан суҳбатлашилганда ҳақиқатдан ҳам ўша куни ўта маст ҳолатда бўлганлигини, ходимларга нисбатан қилган хатти-ҳаракатларидан афсусда эканлигини билдирди”, — дейилади хабарда.

 

Ҳозирда видеотасвирдаги ИИО ходимларининг хатти-ҳаракатлари юзасидан хизмат текшируви тайинланган.