Озарбайжон ва Арманистон ТИВ раҳбарлари нималарга келишиб олди?
Икки давлат бош дипломатлари Вашингтонда учрашди.
Озарбайжон ва Арманистон ТИВ раҳбарлари Вашингтондаги учрашувда музокаралар жараёнини тезлаштиришга келишиб олди. Бу ҳақда ҳар икки давлат ташқи сиёсий идоралари матбуот хизматлари маълум қилди.
“7 ноябрь куни Арманистон ташқи ишлар вазири Арарат Мирзоян ва Озарбайжон ташқи ишлар вазири Жайхун Байрамов АҚШ пойтахти Вашингтонда музокаралар ўтказди. Вазирлар Блэр-хауч резиденциясига ташриф буюрди. Бу ерда АҚШ давлат котиби Энтони Блинкен билан учрашув бўлди. Арманистон ва Озарбайжон ТИВ раҳбарлари музокаралар жараёнини тезлаштиришга ва яқин ҳафталарда яна бир учрашув ўтказишга келишиб олди”, – дейилади баёнотда.
Вазирлар потенциал тинчлик шартномаси бўйича фикрлар алмашган ва ечилиши керак бўлган қатор муаммолар борлигини қайд этишган. Ҳар икки томон ҳам 6 октябрда Прагада ва 31 октябрда Сочида давлат раҳбарлари учрашувида олинган мажбуриятларни тасдиқлаган.
