WP : БАА Қўшма Штатлар ички ишларига аралашган бўлиши мумкин
Абу-Даби Вашингтонда ўз миллий манфаатларини илгари суриш учун катта маблағ сарфлагани айтилмоқда.
АҚШ разведкаси маълумотларига кўра, БАА узоқ йиллар давомида Америка сиёсатига аралашишга ҳаракат қилган. The Washington Post манбаларига кўра, Абу-Даби қонуний ва ноқонуний йўллар билан Вашингтон ташқи сиёсатини ўз фойдасига йўналтиришга ҳаракат қилган.
Хусусан, мамлакатнинг АҚШдаги элчихонаси “БААнинг Қўшма Штатлардаги таъсири ва юқори мавқеидан фахрланиши”ни айтган. Амирликлар Америка сиёсий тизимининг нозик нуқталаридан фойдаланишга ҳаракат қилгани айтилмоқда.
Разведка маълумотларига кўра, БАА 2016 йилдан буён лоббизм учун 154 миллион доллардан ортиқ маблағ сарфлаган. Бундан ташқари, юзлаб миллион доллар АҚШ университетлари ва тадқиқот марказларига хайрия қилинган. WP’нинг қайд этишича, уларнинг аксарияти БАА учун ижобий натижаларга эга тадқиқот ишларини эълон қилган.
Абу-Даби бир неча маъмурият даврида шу каби ишларни амалга оширгани қайд этилган. БАА элчихонаси ушбу маълумотларни тасдиқламаган, аммо инкор ҳам қилмаган. Элчи Юсуф Ал-Утайба амирликларнинг мавқеи самарали дипломатия натижаси эканини таъкидлаган.
