Украинасиз Россия билан музокаралар бўлмайди—Байден
АҚШ Президенти қишда уруш секинлашишини айтди.
Қўшма Штатлар Украинанинг иштирокисиз Россия Федерацияси билан музокаралар олиб бормайди. Бу ҳақда АҚШ президенти Жозеф Байден Балидаги матбуот анжуманида айтиб ўтди.
Америка раҳбарига журналистлар Россиянинг Херсондан чекиниши урушдаги бурилиш нуқтасими ёки Қўшма Штатлар Украинанинг бутун ҳудудини озод қилиш учун қўллаб-қувватлашда давом этиши ҳақида савол билан мурожаат қилган.
“Бу Украина учун муҳим, аҳамиятли ғалаба. Мен Украина халқи ва Украина ҳарбийларининг жасорати, қатъияти ва қобилиятини олқишлашдан бошқа ҳеч нарса қила олмайман. Қўшма Штатлар Украина халқига ўз мудофааси учун имкониятлар яратишда давом этади. Ва биз ҳеч қандай музокараларда қатнашмоқчи эмасмиз. Бу украиналиклар қабул қилиши керак бўлган қарор”, - деди Байден.
Шунингдек, Оқ уй раҳбари қиш ойларида жанг майдонида “бироз секинлашув” сезиларли бўлади, деган фикрни билдирди.
