“Намунавий уйнинг намунасиз ҳолати”
Қурилиш вазирлиги давлат дастури асосид қурилиб, ҳозирда яроқсиз ҳолатга келиб қолган уй бўйича изоҳ берди.
Ижтимоий тармоқларда Тошкент вилоятининг Янгийўл туманида давлат дастури асосида қурилган уйлар яроқсиз ҳолатга келиб қолгани акс этган суратлар тарқалди. Ҳолатга Қурилиш вазирлиги расмий муносабат билдирди.
Қайд этилишича, Янгийўл тумани “Озод” МФЙдаги 64-уй 2012 йил давлат дастури асосида “Қишлоқ қурилиш инвест” МЧЖ Тошкент вилояти филиали буюртмачилиги, “Қишлоқ қурилиш лойиҳа” МЧЖ лойиҳа ташкилотининг намунавий лойиҳалари асосида қурилган. 2013 йил хонадон эгалари ва давлат қабул комиссияси аъзоларининг эътирозларисиз қабул қилинган.
Мазкур хонадон Тошкент вилояти Бекобод туманида туғилган, ҳозирда Тошкент шаҳрида яшовчи фуқаро Х.С.га қарашли бўлиб, ушбу уйда 2021 йилнинг охиригача бегона фуқаролар ижарада яшаб келган.
“2022 йилдан бошлаб уй қаровсиз қолган. Жорий йилнинг баҳор ойларидаги сурункали ёғингарчиликлардан ҳосил бўлган ёмғир сувлари уйнинг пойдевор қисмига кетганлиги натижасида пойдеворда чўкиш, нураш ва емирилишлар ҳосил бўлганлиги сабабли бинонинг асосий юк кўтарувчи деворлари босимни кўтара олмаган, натижада ёриқлар пайдо бўлган”, — дейилади хабарда.
Таъкидланишича, уйнинг техник ҳолатини ўрганиш бўйича “Қишлоқ қурилиш лойиҳа” МЧЖ томонидан техник кўрикдан ўказилган ва унинг натижалари бўйича уйни қайта тиклаш мақсадга мувофиқ эмас деб топилиб, уни бузиб, қайта қуриш бўйича тегишли хулоса чиқарилган.
