Литва Польшага ракета қулаганидан сўнг бутун НАТО шарқини кучайтиришни таклиф қилмоқда
Кеча Польшанинг Украина билан чегара яқинидаги ҳудудига икки ракета қулаганди.
Литва Президенти Гитанас Науседа НАТО шарқий қаноти ҳаво ҳужумига қарши мудофаа тизимини кучайтиришни таклиф қилди. У Польша ҳудудига қулаган ракета ҳодисасига шундай муносабат билдирган.
“Польша Президенти менга НАТО шартномасининг тўртинчи моддасини фаоллаштириш бўйича мурожаат қилишини айтди. Шубҳасиз, Литва бу ташаббусни қўллаб-қувватлайди ва Украина билан чегара яқинига ҳаво ҳужумига қарши мудофаа тизимини жойлаштиришда фаол иштирок этади. Аммо биз буни бутун шарқий қанотга нисбатан қўлланилиши тарафдоримиз”, – деган у.
Литва раҳбари 28-30 июндаги НАТОнинг Мадрид саммити якунида имзоланган ҳужжатларда НАТО шарқида ҳаво мудофаасини кучайтириш қайд этилганини эслатган. Науседанинг фикрича, Польшадаги ҳодиса бу тамойилларни тезроқ татбиқ этиш заруратини вужудга келтирди.
