Тоқаев БМТни ислоҳ қилишга чақирди
Қозоғистон Президенти мамлакат ташқи сиёсати ҳақида ҳам гапирган.
БМТ ислоҳ қилиниши ва янада инклюзив глобал тузилмага айланиши керак. Бу ҳақда Қозоғистон Президенти Қосим-Жўмарт Тоқаев маълум қилди.
“Халқаро масалаларда Қозоғистон доимо БМТнинг универсал принципларига содиқ қолади. Бошқа томондан ташкилотни янада инклюзив тузилмага айлантириш ва барча давлатлар манфаатларини ҳисобга олиш учун ислоҳ қилиш керак”, – деган у.
Тоқаевнинг сўзларига кўра, Остона мамлакат миллий манфаатларини ҳимоя қилишга қаратилган ташқи сиёсат юритмоқда. Президент мамлакатга нисбатан турли террорчилик ва гибрид таҳдидлар кучайиб бораётганини қайд этган.
“Евроосиё марказида туриб Қозоғистон ушбу таъсирларни сезмоқда. Аммо биз асосий мақсади кучли давлат, адолатли жамият қуриш бўлган ислоҳотлар йўлидан қайтмаймиз”,— деб қўшимча қилган.
БМТ ва унинг тузилмаларини ислоҳ қилиш ҳақида шу кунгача бир қатор давлат раҳбарлари айтганди. Хусусан, Туркия, Германия, Россия етакчилари бу бўйича ўз таклифини берган.
