Сурхондарёда фермерлар ўзини трактор тагига ташламоқчи бўлди
Ҳолатга ИИБ матбуот котиби изоҳ берди.
Ижтимоий тармоқларда Сурхондарё вилояти Қизириқ туманида “Surxon Cotton Textile Cluster” МЧЖ ҳамда “П.Туропов” ва бошқа 13 нафар фермер хўжаликлари раҳбарлари ўртасидаги келишмовчиликлар ҳақида хабарлар тарқалди. Ҳолат юзасидан ИИВ матбуот котиби муносабат билдирди.
Маълум бўлишича, 18 ноябрь куни мазкур келишмовчиликлар очиқдан-очиқ жанжалга айланиб, воқеа иштирокчилари ўзларини трактор тагига ташлаш, бир-бирига ҳамда ўзгаларнинг транспорт воситаларига шикаст етказиш каби ҳаракатларни амалга оширганлар.
Чақирувга асосан воқеа жойига етиб келган ҳудудий ички ишлар органлари ходимлари жамоат тартибини тиклаб, ҳуқуқбузарлик содир этган шахслар билан профилактик суҳбат ўтказганлар.
”Ички ишлар органлари ходимлари тадбиркорларнинг ёки фермерларнинг иш фаолиятига аралашиш ҳуқуқлари йўқ. Лекин мақсадидан қатъий назар жамоат тартибини бузилишига йўл қўйилмайди”, - дейилади хабарда.
