ISW: Россия бутун Украинани назоратга олиш фикридан қайтмаган
Экспертлар Кремль нима учун бир-бирига зид баёнот бераётганини тахмин қилди.
Кремль бутун Украинани назоратга олиш мақсадидан қайтмаган, аммо Ғарб давлатларини чалғитиш учун уни ортга сурган. Бу ҳақда Америка уруш тадқиқотлари институти (ISW) экспертларининг навбатдаги ҳисоботида сўз боради.
Москва Ғарбнинг Украинага музокаралар столига бориши учун босим ўтказишини истаяпти. Владимир Путиннинг матбуот котиби Дмитрий Песков 21 ноябрда Россия Украинада ҳокимият алмашинишини мақсад қилмаганини, РФ Президенти бу ҳақда бир неча бор айтганини таъкидлаганди. Амалда Путин ушбу баёнотнинг бутунлай аксини гапирганди.
Кремль мақсадларининг чалкаш кўриниши Ғарб аудиторияси учун мўлжалланган бўлиши мумкин. Бу ўз навбатида Россиядаги уруш тарафдорларини ҳам чалғитмоқда.
Экспертларнинг фикрича, Путин ўта миллатчи ва мўътадил тезислар ўртасида мувозанат сақлашга ҳаракат қилмоқда, бу унинг Россия жамиятидаги турли аҳоли қатламларининг қўллаб-қувватлашига ҳаракат қилаётганидан далолат беради.
