Меркель: Россиянинг Украинага ҳужуми мен учун “сюрприз” бўлмади
Собиқ канцлер сиёсатни тарк этганидан афсусланаётганини маълум қилган.
Германия собиқ канцлери Ангела Меркель учун Россиянинг Украинага босқини кутилмаган воқеа бўлмаган. Бу ҳақда Spiegel журналига берган интервьюсида маълум қилди.
“Бу мен учун кутилмаган воқеа эмасди. 2021 ёзида Байден ва Путин кўришганида мен Путин билан мулоқот учун мустақил Европа форматини тузишни таклиф қилгандим. Аммо кимдир қаршилик билдирди, менда эса ўз фикримни қатъий илгари суриш учун куч қолмаганди, чунки ҳамма кузда лавозимдан кетишимни биларди”, – деган сиёсатчи.
Унинг қўшимча қилишича, 2021 йил августида Москвага ташрифи давомида ҳам унга шундай муносабат бўлган. шунингдек, Меркель Путин учун фақатгина куч аҳамиятга эгалигини таъкидлаган.
Шу билан бирга собиқ канцлер сиёсатдан кетганига афсусланишини билдирди. У янги етакчилар турли глобал ва ички сиёсий муаммолар билан шуғулланиши лозимлигини қайд этган.
