Шаҳрисабзда ёнғинни ўчиришга кетаётган ФВБ машинаси ЙТҲга учради
Ҳолат бўйича бошқарма маълумот берди.
Бугун, 25 ноябрь куни Қашқадарё вилоятининг Шаҳрисабз туманида иккита автомашина иштирокида йўл-танспорт ҳодисаси содир бўлди. Ҳолат юзасидан вилоят Фавқулодда вазиятлар бошқармаси расмий муносабат билдирди.
Қайд этилишича, соат 18.25 ларда ФВБ қутқарув хизматига Шаҳрисабз шаҳар “Катта навқат” кўчасида дарахт ёнаётганлиги тўғрисида хабар келиб тушган. Шундан сўнг ISUZU русумли ёнғин-қутқарув машинаси воқеа жойига ҳаракатланиб бораётган вақтида шаҳарнинг Ипак йўли ва Тарағай Баҳодир кўчалари чорраҳасида қарама-қарши йўналишдан ҳаракатланиб келаётган Cobalt русумли автомобил билан тўқнашган.
Натижада Cobalt автомобили ҳайдовчиси тан жароҳати олиб шифохонага ётқизилган. Ҳолат бўйича суриштирув ишлари олиб борилмоқда.
