Самарқандда “Халқ банки” ходими пора билан ушланди

 

Самарқанд вилоятининг Самарқанд шаҳрида банк ходими пора олаётган вақтида қўлга тушди. Бу ҳақда вилоят ИИБ ахборот хизмати хабар берди.

 

Маълум бўлишича, 2022 йил 21 ноябрь куни фуқаро ҳуқуқни муҳофаза қилувчи органларга ариза билан мурожаат қилиб, банк ходими моддий манфаатдорлик эвазига давлат божини йўқотиб беришини айтганини ва ушбу шахсга нисбатан қонуний чора кўрилишини сўраган.

 

Фуқаро “Халқ банки”нинг Самарқанд вилоят филиалидан 830 млн сўм кредит олган ва хусусий корхонаси гаровга қўйилган. Тўловни вақтида тўлай олмагани сабабли кредит қарздорлиги бўйича иш судга оширилган. Банк ходими эса суд томонидан тайинланадиган 93 млн сўм давлат божини йўқотиб беришини айтиб, эвазига 3 минг АҚШ доллари миқдорида пул сўраган ва дастлаб 1050 АҚШ доллари олган.

 

Аризага асосан 21 ноябрь куни ИИБ Жиноят қидирув бошқармаси Коррупция ва иқтисодий жиноятларга қарши курашиш бўлими, ДХХ ҳамда вилоят прокуратураси ҳамкорлигида ўтказилган тезкор тадбир давомида банк ходими ариза муаллифидан қолган 1950 АҚШ доллари миқдоридаги пулларни олаётган вақтида ашёвий далиллар билан қўлга тушган.

 

Ҳозирда у Жиноят процессуал кодексининг 227-моддаси тартибида ушланиб, унга нисбатан жиноят иши қўзғатилган ва эҳтиёт чораси сифатида қамоққа олинган.