Тошкентда экспресс йўналишдаги автобусда ёнғин чиқди
Ҳолат юзасидан ФВБ мълумот берди.
Бугун, 26 ноябрь Тошкент шаҳрининг Мирзо Улуғбек туманида автобус ёниб кетди. Ҳолат юзасидан шаҳар Фавқулодда вазиятлар бошқармаси маълумот берди.
Қайд этилишича, соат 15:02 да Мирзо Улуғбек тумани М.Улуғбек кўчасида экспресс йўналишида Машинасозлар бекатига ҳаракатланиб кетаётган “Mercedes-Benz” русумли автобусда ёнғин юзага келганлиги тўғрисида шаҳар ФВБга хабар келиб тушган.
Зудлик билан 2 та ёнғин-қутқарув экипажи воқеа жойига етиб борган вақтда ёнғин ҳайдовчи томонидан бирламчи ёнғин ўчириш воситалари орқали бартараф этилгани маълум бўлган.
Ёнғин натижасида автобуснинг мотор қисми ёниб зарарланган. Ҳодиса оқибатида тан жароҳати олган ва ҳалок бўлганлар йўқ. Ҳозирда ёнғин сабаби ва моддий зарар миқдори аниқланмоқда.
