Андижондаги ЙТҲ оқибатида яна бир киши вафот этди

 

Аввалроқ Андижон вилоятида 26 ноябрь куни ISUZU русумли автобус ва  юк машинаси тўқнашиб кетгани ҳақида хабар берилганди. 

 

ЙТҲ оқибатида 3 нафар фуқаро воқеа жойида вафот этгани, 38 нафар йўловчи турли жароҳатлар билан шифохонага ётқизилгани айтилганди.

 

Соғлиқни сақлаш вазирлигининг маълум қилишича, ўта оғир аҳволдаги яна бир нафар бемор амалга оширилган реанимацион чораларга қарамасдан вафот этган.

 

Ушбу фуқаро шифохонага “Бош миянинг оғир даражада лат ейиши. Мия ўзаги шикастланиши. Қорин бўшлиғи аъзолари ёпиқ жароҳати. Жигар сегментларининг эзилиб ёрилиши. Чап билак суягининг очиқ синиб силжиши. Ўнг болдир соҳаси олд юзаси ва ўнг қўл тирсак соҳаларининг 2-даражали куйиши. 3-даражали травматик шок” ташхиси билан олиб келинган. Унда белгиланган стандартлар бўйича барча зарур амалиётлар ўтказилган.

 

Ҳозирда 33 нафар беморда шифокорлар зарур муолажаларни давом эттирмоқда.

 

Назоратда турган беморларнинг 11 нафари РШТЁИМ Андижон филиалида, 16 нафари Асака тумани, 4 нафари Бўстон тумани, 2 нафари Шаҳрихон тумани шошилинч тиббий ёрдам бўлимларида даволанмоқда.

 

Ушбу беморларнинг 1 нафари ўта оғир, 5 нафари оғир аҳволда. Вазирлик уларнинг ҳолатини тўлиқ назоратга олган бўлиб, беморлар зарур тиббий ёрдам ва дори-дармонлар билан тўлиқ таъминланган.