Чироқчида ИИБ ходими туҳмат билан айбланган фуқарога куч ишлатди
Ҳолат юзасидан вилоят ИИБ расмий изоҳ берди.
Ижтимоий тармоқда Қашқадарё вилоятининг Чироқчи туманида профилактика инспекторининг қонуний талабини бажармаётган фуқарога куч ишлатаётганлиги акс этган видео тарқалди. Ҳолат вилоят ИИБ ахборот хизмати маълумот берди.
Қайд этилишича, жорий йилнинг 29 октябрь куни соат 09.00 ларда Чироқчи тумани ИИБ профилактика инспектори У.Мухаммадиев туманда жойлашган 105-мактабда боғбон бўлиб ишловчи 1962 йилда туғилган фуқаро Б.Қ.га илгари унга нисбатан Маъмурий жавобгарлик тўғрисидаги кодексининг 40-моддаси (туҳмат) билан юритилган профилактик йиғма жилди билан танишишни сўраган.
Фуқаро Б.Қ. йиғма жилд билан танишишдан бош тортиб, профилактика инспекторининг ИИБ биносига бориш бўйича қонуний талабини бажармаган ва қаршилик кўрсатган. Видеолавҳада айнан шу жараён тасвирланган.
Ҳолат юзасидан фуқаро Б.Қ.га нисбатан Маъмурий жавобгарлик тўғрисидаги кодексининг 194-моддаси билан ҳужжатлар расмийлаштирилиб, суд органлари томонидан базавий ҳисоблаш миқдорининг бир бараварида жарима қўлланилган.
Профилактика инспектори У.Мухаммадиевнинг ҳаракатлари ИИВ Шахсий хавфсизлик хизмати вилоят бошқармаси томонидан ўрганилиб, қонуний деб топилган.
