Алла Пугачёва Россиядаги сўнгги компаниясини ёпмоқда
Хонанда сентябрда Исроилга учиб кетганди
Алла Пугачева Россиядаги сўнгги компаниясини тугатиш учун ариза топширди. Бу ҳақда “Медуза” нашри ёзмоқда.
Маълум бўлишича, хонанда 23 ноябрь куни тегишли шаклда ариза топширган. 100 фоиз Пугачевага тегишли бўлган “ABP” компанияси мусиқий овоз ёзиш ва албом чиқазиш, телевидение ва радиоешиттириш соҳасида фаолият юритиш ҳуқуқига эга.
2010 йилларда компания “Радио Алла” радиостанциясини бошқарган, шунингдек, Пугачеванинг чиқишларини тартибга солган. Компаниянинг бош директори хонанданинг концерт директори Элена Чупракова.
Россиянинг Украинага бостириб киришидан кейин Алла Пугачева оиласи билан Россияни тарк этди, аммо август ойида қайтиб келди.
Сентябр ойида хонанданинг урушга қарши чиққан турмуш ўртоғи Максим Галкин “хорижий агент” деб эълон қилинганди. Шундан сўнг Пугачева Россиядан Исроилга жўнаб кетди.
