Макрон ва қатор Европа етакчилари АҚШнинг янги иқтисодий сиёсатидан норози

 

 Франция президенти Эммануэль Макрон ва бошқа Европа етакчилари АҚШнинг янги иқтисодий сиёсатидан норози бўлмоқда. Уларнинг фикрича, бу Украина можароси ва энергетик инқироз туфайли келиб чиққан иқтисодий муаммоларни чуқурлаштирмоқда.

 

The Wall Street Journal газетасининг маълумотларига кўра, Макроннинг Жозеф Байден билан учрашувида юқоридаги масала муҳокамалар марказида бўлади. Франция етакчичи Байден томонидан имзоланган инфляцияни пасайтириш тўғрисидаги қонунни Европа саноати учун таҳдид сифатида кўрмоқда. Ушбу қонун Америка иқтисодиётини қўллаб-қувватлаш учун йирик субсидиялар ва солиқ имтиёзлари беришни назарда тутади. WSJ билан суҳбатлашган амалдорлар бунинг ортидан Европада ишлаб чиқарилган кўплаб товарлар — аккумулятор ва электромобилларга зарар етказилишини айтган, чунки имтиёзлар Шимолий Америкада чиққан маҳсулотларга жорий этилади.

 

Париж энергетик ресурсларнинг нархи баланд бўлган бир пайтда аксарият ишлаб чиқарувчиларнинг субсидия ва имтиёз олиш учун АҚШга кўчиб ўтишидан хавотирга тушган. Бунинг олдини олиш учун Макрон ўтган ҳафтада йирик компанияларнинг раҳбарлари билан Елисей саройида учрашган ва улардан мамлакатни тарк этмасликни сўраган. WSJ қатор компаниялар билан боғланиб, вазиятга ойдинлик киритишга ҳаракат қилган, аммо улар учрашув ҳақида ҳеч нарса демаган.

 

Француз расмийларига кўра, Макрон АҚШ президентидан янги қонунда Европа компаниялари учун истисно жорий этишни сўрамоқчи. Оқ уйнинг номи сир қолишни истаган манбалари ушбу масала икки давлат етакчилари муҳокамаси марказида бўлишини тахмин қилган. Макрон, шунингдек, Евроиттифоқни АҚШ қонунига нисбатан биргаликда жавоб қайтаришга чақирган. У Е:вропа ичида солиқ имтиёзларини ишлаб чиқишни таклиф қилган.

 

Байден ёзда инфляцияни юмшатишга қаратилган қонун лойиҳасини имзолади. Бу ташаббус Америка иқтисодиётини қўллаб-қувватлаш учун 400 миллиард доллар ажратишни кўзда тутади.