ИИБда вафот этгани айтилган эркакнинг ўлим сабаби очиқланди

 

Аввалроқ Бухоро шаҳридаги ИИБ биносида Вобкент туманида туғилган эркак вафот этган бўлиши мумкинлиги ҳақида хабар берилганди. Бош прокуратура матбуот котиби Ҳаёт Шамсутдинов расмий муносабат билдириб, мазкур ҳолат ўрганилаётганини маълум қилган.

 

Ички ишлар вазирлиги матбуот хизмати Шоҳруҳ Ғиёсов воқеа юзасидан қўшимча маълумотларни очиқлади.

 

Қайд этилишича, 28 ноябрь куни Жиноят кодексининг 169-моддаси 2-қисми “в,г” бандлари билан қўзғатилган иш бўйича гувоҳ тариқасида жалб этилган фуқаро Қ.Ҳ. соат 15.00 ларда Бухоро шаҳар 4-сон ИИБга жиноят иши ҳужжатлари билан танишиш учун келган.  Шундан сўнг терговчи хизмат вазифаси билан бошқа жойда бўлганлиги сабабли ИИБ биносига кирмасдан, қайтиб кетган.

 

Фуқаронинг ИИБ биносига кирмасдан, қайтиб кетган ҳолати видеотасвирга муҳрланган.

 

Фуқаро Қ. Ҳ. “Матиз” русумли такси автомашинасини тўхтатиб, уни Бухоро шаҳридаги “Файзиобод” жомъе масжидига олиб боришини сўраган. Йўлда фуқаро Қ.Ҳ.нинг соғлиғи ёмонлашиб, оғзидан кўпик чиқиб, ҳушини йўқотган. Ҳайдовчи хушсиз йўловчини тезкорлик билан Бухоро шаҳар касалхонасига етказган.

 

Кўрсатилган тиббий муолажаларга қарамасдан, фуқаро Қ.Ҳ. шу куни соат тахминан 21:00 ларда касалхонанинг жонлантириш бўлимида вафот этган. Суд-тиббиёт экспертизасининг бирламчи хулосасига кўра, ўлим “Тутқаноқ синдроми, ўпка ва мияга кислород ўткир етишмовчилиги” оқибатида юз берган. Текширув жараёнида мурданинг баданида ҳеч қандай тан жароҳатлари аниқланмаган.