Марказий Осиё ва Германия муқобил транспорт йўлакларини ривожлантиришдан манфаатдор
Польшада Марказий Осиё ва Германия ташқи ишлар вазирлари учрашуви бўлиб ўтди.
ЕХҲТ ташқи ишлар вазирлари кенгаши йиғилиши доирасида "Марказий Осиё ва Германия Федератив Республикаси" вазирлар учрашуви бўлиб ўтди. Бу ҳақда Қозоғистон ташқи ишлар вазирлиги хабар берди.
"Кун тартибига Марказий Осиёдаги ҳамкорлик, Афғонистондаги хавфсизлик, иқлим ўзгаришининг минтақа иқтисодиётига таъсири ва бошқа масалалар киритилди. Алоҳида эътибор Марказий Осиё ва Европа давлатлари хамкорлигига, хусусан, минтақалараро савдо ва Европа Иттифоқининг Global Gateway дастури доирасида транспорт инфратузилмасини ривожлантиришга қаратилди", — дейилади ТИВ хабарида.
Қозоғистон ташқи ишлар вазири Мухтор Тлеуберди транспорт-транзит соҳасида ҳамкорлик масаласи сўнгги геосиёсий ўзгаришлар фонида янада долзарб аҳамият касб этиб бораётганини қайд этган. Томонлар муқобил транспорт йўлаклари, жумладан, Транскаспий халқаро транспорт йўналишини ривожлантиришдан бирдек манфаатдор эканини таъкидлаган.
