Гендер тенглик дунё иқтисодиётига 12 триллион доллар фойда келтиради
Ҳозирги суръат билан тенглик 300 йилдан сўнг ўрнатилади.
Иш жойларида гендер тенглигини таъминлаш 2025 йилгача жаҳон иқтисодиётига 12 трлн доллар фойда олиб келиши мумкин. Бу ҳақда Токиодаги Аёллар манфаатлари жаҳон ассамблеяси очилишида "БМТ—аёллар" ташкилоти ижрочи директори Сима Сами Бахус гапириб ўтди.
"Агар меҳнатга лаёқатли аёллар ўз потенциалини амалга оширолмаса, гендер нотенглик жиддий иқтисодий муаммога айланади. Тенгликнинг ривожланиши 2025 йилга келиб глобал ўсишга 12 триллион доллар қўшиши мумкин", — деди у.
Ижрочи директорнинг сўзларига кўра, сўнгги йилларда аёлларнинг жамиятдаги ўрни яхшиланган, аммо пандемия бу жараёнга салбий таъсир ўтказиб, оиладаги зўравонликни кучайтирган, шунингдек, аёллар иш вақти қисқаришига олиб келган.
Сима Сами Бахус ҳозирги суръатлар билан гендер тенглигига эришиш учун 300 йил керак бўлишини айтмоқда.
