“Аграр соҳа аёллари” уюшмаси Юқори Чирчиқда семинар-тренинг ўтказди

 

28 ноябрдан 2 декабрга қадар Тошкент вилоятининг Юқори Чирчиқ туманида Қишлоқ хўжалиги вазирлиги хузуридаги озиқ-овқат ва қишлоқ хўжалигида стратегик ривожланиш ва тадқиқотлар маркази (ISCAD), Ўзбекистон “Аграр соҳа аёллари” уюшмаси, Халқаро тараққиёт ва тикланиш банки ҳамда Халқаро тараққиёт ассоциацияси иштирокида “Ўзбекистон қишлоқ хўжалиги модернизацияси” лойиҳаси доирасида семинар-тренинг ташкил этилди. 

 

“Мазкур семинар Ўзбекистон Республикаси Президентининг Халқаро тикланиш ва тараққиёт банки ҳамда Халқаро тараққиёт уюшмаси иштирокида “Ўзбекистон Республикаси қишлоқ хўжалигини модернизация қилиш” лойиҳасини амалга ошириш чора-тадбирлари тўғрисида”ги қарори ижросини таъминлаш ҳамда янги иш ўринлари яратиш, бандликни таъминлаш ва ушбу йўналишда юқори даромад топиш орқали қишлоқ аҳолиси, биринчи навбатда аёллар ва ёшларнинг турмуш даражасини оширишни назарда тутади. Томорқа хўжаликларини ташкил қилиш ва бошқаришда кўникмаларни ошириш, янги технологияларни ўзлаштириш, уларни амалиётга жорий қилиш ва янги, юқори рентабелли уруғ ва кўчатлардан фойдаланиш муҳим аҳамият касб этади”,– дейди Ўзбекистон Аграр соҳа аёллари уюшмаси раиси Адиба Аҳмеджонова.

 

Ўзбекистоннинг 2020-2026 йилларга мўлжалланган Тараққиёт дастурининг вазифаларидан бири аҳолининг томорқа майдонларидан янада самарали фойдаланиш учун шарт-шароитларни яратиш ҳисобланади.

 

Доривор ва декоратив ўсимликларни парваришлаш, шунингдек, гулчиликни ривожлантириш ўсимликшуносликни янада тараққий эттириш, мамлакат экспорт салоҳиятини ўстириш ва томорқалардан янада самарали фойдаланишга хизмат қилади. Айнан шу соҳа кичик майдонлардан катта даромад олиш имконини беради.

 

Ўқув семинари давомида иштирокчилар Flowers garden - “Манзарали гуллар ва дарахтлар” масулияти чекланган жамияти фаолияти билан танишишди ва уларга зарур тавсиялар берилди. Амалий машғулотлар давомида иштирокчилар турли навга мансуб бўлган манзарали ўсимликлар ва гулларни парваришлаш агротехнологиясига доир ўзига ҳос хусусиятлар билан таништирилди. Шунингдек ички ва ташқи бозорда харидоргир бўлган манзарали ўсимликлар, мавсумий, хона ва кесма гуллар тўғрисида батафсил маълумотлар берилди.

 

Семинарда Туркиянинг Анқара университети Боғдорчилик кафедраси ва Тошкент давлат аграр университети Ландшафт дизайн кафедраси профессори Сонер Казаз ўз тажрибалари билан иштирок этди. Ўқув семинари музокарага бой бўлди.

 

Семинар сўнггида Тошкент вилояти Қибрай, Тошкент ва Янгийўл туманларидан иштирок этган 31 нафар хотин-қизларга сертификатлар топширилди ва улардан энг фаол бўлган 3 нафарига Манзарали ўсимликлар ва гулчиликни ривожлантириш мақсадида Туркия давлатининг Анталия шахрига малака ошириш учун йўлланмалар берилди.