Наманганда тадбиркорни сўккан ҳокимга чора кўрилди
Бу бўйича вилоятда кенгайтирилган муҳокама йиғилиши ўтказилган.
Наманганда маҳаллий тадбиркорни қўпол сўзлар билан ҳақорат қилган туман ҳокимига ҳайфсан берилди. Бу ҳақда “Daryo” нашри ёзмоқда.
Маълум қилинишича, Наманганда вилоят ҳокими Шавкат Абдураззоқов бошчилигида давлат хизматчилари томонидан одоб-ахлоқ қоидаларига риоя этилишини таъминлаш бўйича кенгайтирилган муҳокама йиғилиши ўтказилган.
Унда Янги Наманган тумани ҳокими Жобир Абдуллаевнинг ижтимоий тармоқларда тарқалган сўкинган аудиоси муҳокама қилинган. Ҳоким мазкур аудиоёзувда тадбиркорни қўпол сўзлар билан ҳақорат қилганди.
“Ҳокимнинг бу қилиғини асло оқлаб бўлмайди. Бундай мавқедаги давлат хизматчиси аслида барчага ўрнак ва намуна бўлиши керак. Жумладан, муомала, аҳоли билан муносабат борасида ҳам. Наманганликлар фарзандларини ҳам сизлаб гапиради ахир”, — деган вилоят ҳокими.
Йиғилишда Жобир Абдуллаевга ҳайфсан берилиб, уч ой муддатга барча турдаги рағбатлантиришлардан маҳрум қилинган.
Шунингдек, жорий йил давомида ижтимоий тармоқларда шаҳар ва туманлар ҳокимликлари, вилоят бошқармалари, тегишли ташкилотлар раҳбарларининг хатти-ҳаракатлари бўйича ёритилган масалалар ҳам атрофлича муҳокама қилинган.
